Turismo ornitolóxico

Área recreativa de Campo Darriba. A Eiroa (A Laxe, Fornelos de Montes)
Coordenadas: 42º 20’ 41’’ N / 8º 22’ 03’’ O

Recoméndase realizar un pequeno percorrido de aproximación á serra, partindo do coto da Eiroa, un outeiro que domina o barrio da Eiroa, ao que se accede
facilmente dende a estrada pola súa banda norte. Despois de gozar das oportunidades de observación ornitolóxica que ofrece este outeiro, cruzaremos a estrada para tomar o camiño vello dos Chozos de Casariños. O camiño pasa polo miradoiro da Fervenza de Casariños, deixando a mallada de Campo Darriba uns 250 m cara ao sur. Se se desexa prolongar a visita, unha boa opción é continuar cara ao norte polo camiño que sae dos chozos en dirección ao Coto dos Ladróns até o primeiro golado.

Ponte de Pedra. (San Salvador de Xunqueiras, Pazos de Borbén)
Coordenadas: 42° 18’ 03” N / 8° 29’ 53” O

Recoméndase pasear polo carreiro que vai a carón do río até o encoro de Eiras, xa no río Oitavén. Transcorre á sombra dun bosque de ribeira mesturado con
carballos. Compre camiñar moi de vagar, atento aos cantos e chíos das aves, e de cando en vez deterse a inspeccionar as augas do río e as polas altas das árbores.

Aldea Alfacuca. (San Salvador de Louredo, Mos)
Coordenadas: 42º 13’ 00’’ N / 8º 35’ 28’’ O

Alfacuca é un bo lugar no que deterse a descansar, especialmente cando se vai acompañado de crianzas. Paseando de vagar polos socalcos plantados de
carballos do recinto poden observar algunhas aves comúns, como o merlo, o ferreiro real, o pimpín e o paporrubio. A proposta principal neste punto é a observación de aves polo sendeiro que vai pola beira dereita do río Louro en dirección a Mos, camiñando moi a modo e permanecendo atentos aos chíos e cantos.

Area recreativa do Faro de Budiño. (San Salvador de Budiño, O Porriño)
Coordenadas: 42° 07’ 43” N / 8° 35’ 06” O

Tal e como a súa denominación de Faro suxire, atopámonos nun lugar dende o que vixiar. A proposta sería, por tanto, a de situarse nos outeiros que permiten
abarcar a paisaxe da contorna e permanecer un tempo alí, mais ben prolongado, a vixiar os movementos das aves. Os miradoiros máis axeitados atópanse
nas bandas norte e oeste. Están conectados por unha rede de carreiriños que circundan o coto do Faro pola súa banda leste. A escolla dun ou doutro miradoiro dependerá do momento do día pois compre ter o sol nas costas.

Os Campos. (Páramos, Tui)
Coordenadas: 42° 03’ 22” N / 8° 36’ 11” O

A pista que vai río arriba, pola senda Areeiros-Penedo é agradable de camiñar e permite explorar o arboredo da ribeira e as carballeiras con freixos dos bancos fluviais. A cobertura da vexetación da ribeira é considerable polo que compre aproveitar os ocos na espesura para ollar o río e as illas da beira portuguesa.

As Areíñas. (Goián, Tomiño)
Coordenadas: 41° 55’ 59” N / 8° 45’ 48” O

Sae do aparcamento río abaixo, abeirada á ribeira fluvial, unha senda peonil con treitos de pasarela de madeira moi agradable de camiñar. Cruza bosques naturais, campos cultivados, pasteiros e mesmo un paseo de cerdeiras. Unha camiñada de vagar por este sendeiro permite observar a illa Morraceira e, máis
ao lonxe, na banda de Portugal, a beira norte da illa Bohega, circundada por acacias negras.

A Canosa. (San Miguel de Tabagón, O Rosal)
Coordenadas: 41° 55’ 00” N / 8° 48’ 36” O

O observatorio proporciona unha boa visión do gran pasteiro que ocupa a metade oriental da illa Morraceira das Varandas e mais da estreita canle que separa a illa da ribeira. Ademais de permanecer no observatorio o tempo necesario para que vaian aparecendo as especies que viven nesta ribeira, é moi recomendable achegarse ao sobreiral de Eiras facendo uso das pistas e camiños que van pola beira do río.

O Codesal. (Camposancos, A Guarda)
Coordenadas: 41° 53’ 02” N / 8° 51’ 25” O

Punto óptimo para a observación, a distancias relativamente curtas, tanto na baixamar como na pleamar, da meirande parte das aves acuáticas do Baixo
Miño. Na baixamar as aves distribúense polo intermareal diante das praias; na preamar concéntranse nos illotes e baixos da Punta Codesal. Nos períodos máis favorables (inverno e pasos migratorios) este punto garante a observación dunha gran variedade de especies. Recoméndase igualmente achegarse a pé até a desembocadura do Miño (a 2000 m de distancia) ou, cando menos, até a praia do Muíño.

As Mariñas. (Mougás, Oia)
Coordenadas: 42° 04’ 11” N / 8° 53’ 34” O

Este é un lugar no que botar tempo ollando cara ao mar. É recomendable realizar a visita polo serán en días nos que as condicións de vento e mar sexan
favorables; son preferibles os ventos moderados, do norte en outono e do sur na primavera. No caso de dispor de telescopio tamén pode ser interesante achegarse ao Miradoiro de Aguncheiro, situado 2200 m cara ao sur nun pequeno outeiro de 30 m de altitude.

Cabo Silleiro. (Baredo, Baiona)
Coordenadas: 42°06’34”N / -08°53’59”W

Cabo Silleiro é un dos principais puntos de observación do paso das aves mariñas que migran ao longo da costa atlántica europea polo Corredor Migratorio
do Atlántico Oriental. No paso de primavera (marzo, abril, maio) o movemento é cara ao norte, cara ás colonias de cría mentres que no paso de outono (agosto, setembro, outubro) as aves circulan en sentido contrario, cara ás localidades de invernada. É recomendable realizar a visita polo serán en días nos que as condicións de vento e mar sexan favorables; son preferibles os ventos moderados, do norte en outono e do sur na primavera. Do recinto do faro sae cara ao sur un carreiro que permite percorrer a matogueira da banda litoral ao longo dalgúns centos de metros.

A Xunqueira. (San Martiño de Borreiros, Gondomar)
Coordenadas: 42° 06’ 48” N / 8° 48’ 00” O

Recoméndase planificar unha visita prolongada e instalarse comodamente no observatorio, atentos ás aves da xunqueira e do río. A ponte do Miñor, na mesma estrada, é un bo punto de observación complementario ao observatorio. A estradiña que sae diante da Capela da Virxe da Luz cara a Burgovedro permite inspeccionar a chaira de prados e pasteiros augacentos da banda sur da xunqueira.

O Carregal. (San Fiz de Nigrán, Nigrán)
Coordenadas: 42º 08’ 12” N / 8º 49’ 00” O

A visita a este ecosistema realízase pola beirarrúa da avenida aproveitando os treitos de pasarela que se achegan ao río. É recomendable completar a visita cunha camiñada de vagar pola pista que remonta a beira dereita do río Muíño ao longo dos seus primeiros 700 m.

A Portela. (Cedeira, Redondela)
Coordenadas: 42º 17’ 13” N / 8º 37’ 18” O

Recoméndase percorrer de vagar o paseo da Portela, facendo paradas frecuentes para observar as aves do esteiro. O paseo pódese prolongar cara á Punta do Socorro. O peirao da Portela é un punto de observación privilexiado con vistas ás augas libres do Suroeste da Enseada de San Simón.

Arcade. (Soutomaior)
Coordenadas: 42º 20’ 26 ”N / 8º 36’ 52” O

Aínda que a observación das augas da enseada dende o porto de Arcade é interesante, especialmente na baixamar, recoméndase vivamente continuar a visita camiñando polo paseo da beira do esteiro, en dirección norte, cara á Ponte Sampaio.