A Festa da Chanfaina e da Carne do Suído consolídase como exemplo de celebración sostible da man de Galicia Suroeste.

A XXI edición da Festa da Chanfaina e da Carne do Suído, celebrada este domingo no municipio de Fornelos de Montes, reafirmou o seu compromiso cun modelo de celebración tradicional e sostible grazas ao acompañamento do proxecto Festas Sostibles da Asociación Galicia Suroeste Eurural, financiado a través do PSTD "A Despensa de Galicia" con fondo PRTR NEXT GENERATION - UE.

Durante a festa realizouse unha visita técnica que permitiu identificar boas prácticas e avanzar no proceso de certificación como evento sostible promovido polo programa. A implicación da veciñanza, o coidado na selección dos produtos e a atención á redución de residuos foron claves nesta edición.

Entre os aspectos máis destacados figura o uso de materiais biodegradables e sostibles, como pratos de cartón e cubertos de madeira dun só uso, así como a instalación dun punto de auga gratuíto na barra, que permitiu reducir o uso de envases. 

A festa contou cun equipo de voluntariado ambiental composto por catro persoas, que se encargaron da correcta separación dos residuos xerados. Destaca especialmente a autoxestión dos residuos orgánicos, que foron recollidos por veciñas e veciños para alimentar aos seus animais ou para facer compostaxe doméstica, evitando así o seu traslado a vertedoiro ou planta de tratamento.

No eido gastronómico, a festa puxo en valor dous produtos identitarios da comarca: a chanfaina, unha longaniza feita artesanalmente coas partes máis nobres do porco, e a carne do Suído, procedente do ganado criados en liberdade na serra, preparados á brasa con receita tradicional. Todo o menú completouse con ovos da zona, doces caseiros e pan de forno.

A organización da festa correu a cargo do Concello de Fornelos de Montes e do tecido asociativo local, que levan anos mantendo viva esta celebración como símbolo do vínculo entre territorio, tradición e sostibilidade.

Desde Galicia Suroeste agradecen a excelente disposición da organización, do Concello de Fornelos de Montes e de todas as persoas colaboradoras, e animan a continuar camiñando cara a un modelo de festas que conecten identidade, medio ambiente e ruralidade.

“Cada festa que aposta pola sostibilidade está a contribuír a un cambio máis amplo, que conecta identidade local, coidado do medio e futuro do rural”, sinalan desde Galicia Suroeste.