Galicia Suroeste e o Concello de Gondomar inician as obras para a iluminación eficiente e artística da Igrexa de San Benito e a súa contorna.

O alcalde de Gondomar, Paco Ferreira, visitou o comezo dos traballos de iluminación eficiente e artística da igrexa de San Benito e da súa contorna, acompañado pola presidenta de Galicia Suroeste, Sandra González, alcaldesa de Tomiño, e pola representante institucional de Xeodestino e alcaldesa de O Rosal, Ánxela Fernández Callís. Ao acto asistiu tamén o párroco, que acompañou á visita durante o percorrido polo templo e a súa contorna.

A actuación contempla a instalación dun sistema de iluminación eficiente con tecnoloxía LED de baixo consumo, que permitirá reducir o gasto enerxético e mellorar a sustentabilidade do edificio. Ao mesmo tempo, o novo deseño lumínico destacará os elementos arquitectónicos e artísticos máis relevantes do templo, reforzando o seu valor histórico e cultural.

De maneira especial, o proxecto inclúe a iluminación das escaleiras exteriores da igrexa, espazo emblemático no que cada ano se elaboran os tradicionais tapices florais do Corpus Christi. Esta intervención permitirá realzar o valor estético destas composicións efémeras e mellorar as condicións de visibilidade e seguridade durante unha das celebracións máis significativas do calendario local.

O proxecto está financiado a través do PSTD “A Despensa de Galicia”, xestionado por Galicia Suroeste e financiado con fondos europeos Next Generation, no marco do Plan de Recuperación, Transformación e Resiliencia. Esta liña de investimento ten como obxectivo impulsar actuacións que reforcen a sustentabilidade, a eficiencia enerxética e a posta en valor dos recursos patrimoniais e turísticos do territorio.

Durante a visita, as autoridades destacaron a importancia de investir na conservación e dinamización do patrimonio como motor de desenvolvemento turístico e económico para o destino, así como a relevancia dos fondos europeos para facer realidade actuacións estratéxicas nos concellos.

As obras desenvolveranse nas próximas semanas e supoñen un paso máis na estratexia de valorización do patrimonio histórico de Gondomar, consolidando a Igrexa de San Benito como un referente cultural e turístico.

O investimento desta intervención ascende a 62.000,00€ financiados ao 100% polo Plan de Sustentabilidade Turística en Destino, e o seu remate está previsto para o mes de abril, co fin de poder contar este mesmo ano coas melloras de iluminación durante a celebración do Corpus en Gondomar. Dita festividade recibe un importante número de visitantes e turistas ao ser os únicos tapices florais realizados sobre escaleiras. Esta singular aporta un valor diferencial que fai desta manifestación de arte efémera unha representación única en toda Galicia.