Mos avanza cara a un modelo de festa máis sostible e consciente co territorio da man de Galicia Suroeste.

A Festa da Empanada do Pan de Millo, enmarcada dentro da Festa da Rosa do Concello de Mos, deu este ano un paso firme cara á sostibilidade. O evento, organizado en colaboración co Concello e coa Asociación de Mulleres Rurais de Mos, integrou múltiples medidas que o sitúan como exemplo inspirador para outras festas populares.

Desde o programa Festa Sostible, financiado co Plan de Sustentabilidade Turística en Destino, “PSTD A DESPENSA DE GALICIA”, impulsado por Galicia Suroeste, realizouse unha visita técnica para observar e acompañar a implantación das boas prácticas ambientais durante o transcurso da festa. A valoración foi moi positiva. Todos os postos do recinto foron construídos en madeira reutilizable, con deseño coidado e unha imaxe coherente, evitando estruturas efémeras e xeración de residuos innecesarios. Ademais, utilizouse cartelería reutilizada doutras edicións, demostrando un compromiso real coa redución de materiais dun só uso.

A oferta gastronómica destacou pola súa vinculación ao territorio: todos os produtos eran de proximidade, e a empanada de pan de millo actuaba como eixo identitario da celebración. Tamén se implantou o uso de vasos reutilizables, moi ben recibidos tanto polo público como pola organización, que amosou entusiasmo coa súa chegada e coa estética que aportan ao evento.

Un dos aspectos máis salientables foi a xestión dos residuos. Non se colocaron papeleiras convencionais repartidas polo recinto, senón que se apostou por un único punto de entrega, ben sinalizado e atendido por dúas persoas formadas durante o propio evento. Esta medida facilitou a correcta separación e garantiu un control efectivo dos fluxos de residuos, nun ambiente de colaboración tanto coas persoas asistentes como co persoal dos postos de comida e bebida, que comprenderon perfectamente a mecánica establecida para este ano.

Outra boa práctica destacada foi a visibilidade do punto de auga potable, claramente sinalizado desde o acceso principal ao recinto, o que favorece o uso de botellas reutilizables e reduce o consumo de envases plásticos.

Galicia Suroeste quere recoñecer a excelente disposición do Concello de Mos e da Asociación de Mulleres Rurais de Mos, que demostraron unha actitude exemplar e aberta á mellora continua. A intervención desenvolvida durante a festa foi cualificada como “frutífera e moi ben coordinada”.